Tandans literè, peryodizasyon epi istorik pwezi kreyòl Ayiti

Nan atik sa a nou abòde sitiyasyon lang kreyòl la depi nan peryòd kolonyal. Nou pwopoze yon tablo peryodizasyon pwezi kreyòl Ayiti a epi nou analize kèk nan tèks ki te pibliye nan epòk kolonyal, espasyalman nan pati zile a ki te sou kontwòl Lafrans lan. Gen moun ki pale de tandans literè, men teknikman vrè tèm lan se kouran literè oswa mouvman literè. Lè nou di  mouvman literè, nou ap pale de yon gwoup moun ki genyen yon oryantasyon nan travay yo ap fè. Yo genyen yon responsab, sa vle di: yon lidè epi yo genyen yon pwopozisyon pou yo pote yon nouvote nan domèn yo chwazi pou yo devlope a. Soti 1804 rive nan ane 1960 yo, sèl gwoup ki kadre definisyon mwen fenk site la a se Sosyete Koukouy. Nan liv 100 Kesyon pou Akademi Kreyòl Ayisyen, Pierre Michel Chéry epi kèk lòt akademisyen konpile, genyen kesyon # 63 a : Nan ki lane koze literati kreyòl la kòmanse parèt nan peyi a ?